البيتزا
دى عجينتها معتمدة عندى وعمرها ما باظت منى الحمد لله وسهله جدا انا مش بحط مقادير محددة ومش بتفرق فى الطعم الحمد لله
المقادير
كيلو دقيق
كوب زيت
خميرة فورية
معلقة ملح
معلقة سكر
رشة بيكنج بودر
ماء للعجين
زعتر ناشف
الطريقة
1-ندوب السكر فى كوبايه مية وندوب معاهم الخميرة الفورية ونسيبهم على جنب لحد ما الخميرة ترتفع
2-ننخل الدقيق ومعاه البودر ونحط عليه الملح وبعدين رشة زعتر مش كتير يعني وبعدين نضيف الخميرة وبعدين الزيت وشوية مية صغيرين ونعجن ونضيف مية شوية بشوية لحد ما العجينة تتضبط معاهنا وتتعجن كويس ولو حسيتيها بقت لينة زيادة عن اللزوم زودي شوية دقيق عادى
المهم تتعجن كويس لان ده سر طراوة العجينة وبعدين نغطيها ونسيبها فى مكان دافى ساعه
3-مش هنقعد الساعه فاضيين بقى لا ههههههههه
نقطع طماطم وفلفل اخضر وزيتون كل ده نقطعه طرنشات رفيعه مش تخينه وسر الخلطة بقى بصل اخضر نقطعه رفيع برضه
نعمل صلصة البيتزا نقطع بصله صغنونة على فصين توم مفرومين ونشوحهم فى شوية زيت ونضيف عليهم الطماطم المفرومة وملح وفلفل ونسيبهم يتسبكوا كويس على النار
4-فى خلال الساعه دى نطلع العجينة نعجنها مرة تانيه بسرعه كده ونسيبها تكمل خمير تانى
5- ندهن صينية زيت ونفرد العجينة فيها بس على فكرة المقدار ده يعمل صينية كبيرة جدا فناخد بالنا يادوب العجينة تبقى متوسطة مش رفيعه اوى علشان ما تتحرقش ومش تخينة لانها لسه هترتفع فى الفرن ونخرم العجبنة من النص بشوكة او عود خشب علشان ما تتنفخش من النص
6- ندهن وش العجينة بالصلصة ونرص الطماطم والفلفل الاخضر والزيتون والبصل الاخضر ونضغط عليهم ضغطه خفيفه بايدنا علشان تمسك فى العجينة وبعدين رشه زعتر ورشه زيت زيتون ورشة ملح وفلفل اسود وبلاش اى بهارات تانى علشان متغيرش الطعم
7 ندخلها الفرن على نار متوسطة لحد ما تستوى وبعدين نحط الجبنة الشيدر بتبقى تحفة فيها او جبنة موتزاريلا او اى نوع جبن نحبها وبكمية كبيرة علشان تدى طعم حلو وندخلها الفرن تانى يادوب الجبنة تسيح ونطلعها تتقطع وتتاكل هم هم هم
على فكرة البيتزا دى بيتزا خضار لو نحبها بيتزا لحم نحط اللحمه المتعصجة مع الطماطم والفلفل والزيتون او بيتزا دجاج نحط قطع دجاج مستوية مكان اللحم وممكن بيتزا بالتونة او بيتزا سي فود بنحط جمبرى متقشر ومتقطع وسبيط متقطع برضه بدل اللحم حسب راحتنا يعني وممكن نحط مشروم كمان
ولو فاض عندك عجينة حطيها فى كيس فى الفريزر عادى وابقى طلعيها اى يوم تفك واعمليها على طول
انا برضه بعمل عجينة تكفى الشهر واقسمها فى اكياس واى وقت اطلع كيس يفك وتبقى جاهزة على السوا على طول
منقوللللللللللللللل