لاتدفعى ابنك للسرقه

المشكله دى مش مشكله بسيطه او هينه

ومش مشكله تربيه اطلاقا

السرقه عاده

لازم نتجنب حدوثها

انا شفت اطفال فعلا بيسرقوا فحين انهم مش محتاجين حاجه

وسألت نفسى كتير ياترى ايه اللى بيخلى الطفل يسرق؟

وبعد عده ابحاث وقراءات وتدوير وتمحيص

توصلت لاسباب كتيره اوى

فى اطفال بيسرقوا لانهم بيجيلهوم كل حاجه

اى طلب بيطلبه بيبقا عنده

الطفل ده للاسف بيتجه للسرقه

لانه لما بيلاقى حاجه مع طفل تانى وبيحس انها عاجباه ومش طايلاها

بيتجه لانه يسرقها لانه متعودش ولا اتعلم معنى انه عاوز حاجه ومش بتيجى

عشان نتقى الموضوع ده لازم تعودى طفلك ان مش كل اوامره مجابه

لازم يجرب الصبر

لكن بلاش حرمان طبعا عشان منجيبش نتيجه عكسيه

الخطر الاكبر بقا مش فاللى فات لان اغلب البيوت مش بيعملوا كده

طفلك بيروح المدرسه بتجيبيله انتى كل حاجه

ساندويتش

عصير

حاجه حلوه يحلى بيها

ومفيش مصروووووف!!!! لانه خلاص معاه كل حاجه

دى مشكله كبيره متديش ابنك الحاجه الحلوه ولا العصير بس اديله مصروف

حتى لو بيضيع منه

حتى لو بيضحكوا عليه ويدوله حاجه غاليه

لان هو هيشوف صحابه رايحين يشتروا

هيحس باحساس صعب

ممكن يضطر انه يسرق من صحابه مصروفهم

وده بنتى اتعرضت ليه واحده كانت كل يوم تسرق مصروفها

وممكن يسرق من البيت

حتى لو طفل سنه صغير بلاش استهوان

مشكله ان الطفل معندوش مصروف خاص بيه شهرى او اسبوعى

ده برضه يعرضه للسرقه

لانه بيطلب الحاجه ممكن تبقا غاليه

هو مش مقدر يعنى ايه غاليه ويعنى ايه رافضه تجيبيهاله

فيبتدى يفكر هما رافضين ليه؟؟

ويتجه انه برضه ممكن يسرق من البيت

عشان تحلى الموقف ده لازم تتفقى مع ابنك على مصروف شهرى او اسبوعى

يكون خاص بيه ويشترى بيه الى هو عاوزه من غير ادنى تدخل منك

حتى لو حاجه ملهاش لازمه

متعقبيش على شراه

هو تانى مره هيتعلم وهياخد باله

وهيقدر يعنى ايه معاه فلوس ومش عارف يشترى حاجه غاليه

يحس بقيمه الفلوس

ومع الوقت هيحوش لو عاوز حاجه غاليه شويه عن فلوسه

وقتها حاولى تساعديه بالقليل

مش بالكثير عشان بس يحس ان فى مساعده معاه ويفرح انه وصل لحاجه

بس ياريت المصروف تكونى قادره عليه

انا بدى بنتى خمسه جنيه فالاسبوع يعنى عشرين جنيه فالشهر

هى رايحه تالته ابتدائى يعنى مناسب ليها كبدايه ومناسب ليا لانه اوفر

من طلباتها اللى مش بتخلص

الطفل بيكره احساس ان بابا وماما بخلاء

لما يشوف بابا بيعد الفلوس قدامه او معاه فلوس كويسه وشاف بنفسه

او ماما

ويجي يطلب طلب منهم ويقولوا معناش فلوس دلوقتى

طبعا القصد انهم معهمش فلوس للحاجه دى بالذات

الطفل بيحس ان الاب والام بخلاء وانهم معاهم ورافضيين يجيبلوا الحاجه

برضه ده سبب يخلى الطفل يتجه للسرقه

لو معاكى فلوس بلاش تبينيها للطفل لو مش هتقدرى تجيبى اللى هو عاوزه

وبرضه دى علاجها محلول لما تديله مصروف

انا قلت خبرتى كلها ياريت لو حد عنده اضافه يزودها
نقلته لافادتكن لاتدفعى ابنك للسرقه