لمشويات
فيه تتبلات كتيرة جدا للمشويات بس انا بعمل تتبيلة واحدة للمشويات كلها وبتطلع جميلة
بصل+ملح+فلفل اسود+كل البهارات اللى عندك+حبهان_معلقتين صويا صوص او معلقتين عسل ابيض+زبادي او لبن+خل+معلقتين كاتشب وممكن نستغنى عنهم+معلقتين زيت
هنضربهم فى الخلاط كلهم وننقع فيهم اللحمة او الفراخ اللى هتتشوى قبل الشوي بليله ونحطهم فى التلاجه لحد وقت الشوي
بالنسبة للشوايه اللى عندى هى شوايه فحم ولو اى شوايه تانى اوك برضه
ما نخافش ان اللحوم تنشف مننا او ما تستويش ليييييييييه؟
احنا حاطين فيها خل وزبادي وكما نقعناها ليلة كاملة فى التتبيلة هيخلي اليافها طرية وتستوى بسرعه
كمان الزيت اللى حاطينه مش هيخليها تنشف
اللحوم نحاول تبقى ستيك زي لحمة البفتيك كده ولو قطع تبقى مكعبات صغيرة
الفراخ كمان تبقى زي بتاع البانيه او لو بالجلد والعظم ندقها شوية قبل ما ننقعها فى التتبيله علشان تشرب التتبيلة كويس وتبقى سهله فى التسوية
واحنا بنشوى كل شوية هنرش من التتبيله على اللحم او الفراخ
وبعدين فى الاخر كده المشويات عموما بتبقى بتشد شوية يعني مش بتبقى مستوية جامد فمتقلقوش
النجرسكو
و دى فكرة المكرونة بالبشاميل بالضبط بس بالفراخ
1-نسلق الفراخ عادى ونخليها ونقطعها حتت
2-نسلق المكرونة زي ما قلنا قبل كده للبشاميل
3-نعمل البشاميل بنفس الطريقة اللى قلناها قبل كده كمان
4- هنقلب كل الحاجات دي على بعضها البشاميل والفراخ والمكرونة وندهن صينية خفيف بالزيت ونرشها بالبقسماط علشان ما تلزقش وبعدين نصب فيها الخليط ونحط على وشها جبن مبشور وندخلها الفرن لحد ما الجبن يسيح وتتقدم
شيش طاووك
ودى فكرة التكا بس التكا باللحم لكن الشيش طاووق بالفراخ
1- نقطع صدور الفراخ مكعبات متوسطة ونتبلها بنفس تتبيله البانيه ونحطها فى الفريزر يوم كامل
2-نقطع بصل وفلفل وطماطم وبطاطس مكعبات
3- فى عيدان الشوى نحط قطعه فراخ وقطعه بصل وقطعه فلفل وقطعه طماطم وقطعه بطاطس وهكذا لحد ما نخلص العيدان كلها
4-نشويها على الشوايه مع التقليب كل فترة ونسقيها اثنائ الشوي بالتتبيله لحد ما تستوى وتتقدم مش بتاخد دقايق يعني
وممكن نحطها فى صينية بالفرن تحت الشوايه على نار هاديه ونقلبها كل شوية لحد ما تستوى وتتقدم
الفراخ بالكارى وصوص البشاميل
1-هنشوح بصلة صغيرة متقطعة مكعبات صغيرة فى معلقتين زيت
2-هنضيف معلقتين دقيق للبصلة قبل ما لونها يتغير ونقلب كويس وبعدين نضيف كوباية شوربة او مية
3-هنقلب الخليط كويس وبعدين نضيف صدور دجاج متقطعة مكعبات (حوالى 3 او 4 صدور)
4-هنضيف الملح والفلفل الاسود ورشة قرفة ومعلقة كارى وهدي النار لحد ما الفراخ تستوى وبعدين يتقدم بس ناخد بالنا الصوص ما يبقاش تقيل اوى هنقدمه مع ارز ابيض او ارز بالشعرية
كرات البطاطس بالبشاميل واللحمة المفرومة
1-هنعصج اللحمه زي ما قلنا على طريقتها قبل كده
2-هنسلق البطاطس فى مية ورشة ملح لحد ما تستوى وبعدين نقشرها
3-هنهرس البطاطس كويس مع شوية لبن وشوية بقدونس مفرومين ناعم وفلفل اسود ونعملها كور متوسطة
4-هنعمل البشاميل زي ما قلنا على طريقته قبل كده
5-فى صينية هنحط اللحمة المفرومة وبعدين طبقة بشاميل وبعدين نرص كور البطاطس على البشاميل وبعدين نحط باقى البشاميل وجبنة مبشورة وندخلها الفرن لحد ما الجبنة تسيح وبعدين تتقدم مع مكرونة وسلطة
الفراخ المشوية
1-بنعمل لها تتبيله زي البانيه بالضبط(بصل مفروم+خل+ملح+بهارات+معلقتين زيت+معلقتين زبادي او لبن+معلقتين صويا صوص او عسل ابيض)وتتنقع فيها ليلة كاملة
2-تانى يوم تتشوى على الشوايه او تتحط فى صينية فى الفرن ونهدي عليها النار خالص ونغطيها بفويل علشان تستوى شويه وبعدين نشيل الفويل ونسيبها تحت الشوايه لحد ما تتشوي ويبقى لونها جميل
(لو هنشويها على الشوايه كل شوية نرش عليها من التتبيله بتاعتها علشان تفضل طرية وطعمها جميل)
فراخ فيليه محشية
1-صدور فراخ مخليه من العظم والجلد ومن غير تتبيل
2-الحشوة يا اما هتكون لحمة مفرومة معصجة او خضار او جبنة
طبعا اللحمة المعصجة والجبنة مفروغ منهم
3-لو هنحشى بخضار: نشوح بصلة صغنونة فى معلقة زيت ومعلقة سمنة ونحط عليها اى خضار نحبه (بسله -فاصوليا -بطاطس مكعبات -جزر مبشور ) ونحط الملح والبهارت ونسيبه على نار هاديه تستوي
4- نفرد الفيليه شوية بمدقة البفتيك ونحط على كل قطعة فيلة معلقة خضار ونلف الفراخ على شكل اسطوانى وبعدين نلفها فى ورق فويل ونعمل كده مع كل القطع لحد ما ننتهى
5- اما نرصها فى صينية فى الفرن ونحط معاها شوية مية وملح وبهارات لحد ما تستوى وبعدين نقليها وتتقدم
او نغلى مية على النار فيها وفيها بصل وجزر وثوم وبعدين نسقطها متغلفه زي ما هى فى المية لحد ما تستوى وبعدين نشيلها ونحمرها وتتقدم
الفراخ البانيه
1-التتبيلة
بصل +خل+لبن او زبادى وممكن نستغنى عنه+ملح وبهارات +حبهان+صويا صوص او معلقة عسل ابيض وممكن نستغنى عنه
2-نضربهم فى الخلاط كويس وننقع فيهم صدور الفراخ البانيه ونسيبهم يوم كامل فى التلاجه
3-نضرب بيضه فى رشة ملح وفلفل اسود وفى طبق تانى نحط بقسماط ونحط البانيه بالترتيب فى البيض وبعدين فى البقمساط ونضغط عليه بايدنا كده وهو فى البقسماط علشان يمسك وبعدين نحطه فى التلاجه شوية
4- نحمر البانيه فى الزيت على نار متوسطة ومتكتروش الزيت اوى علشان يطلع مضبوط
البفتيك
1-بتجيبي من الجزار لحم بفتيك هو بيقطعه ليكي رقيق وانتى يادوب تروحى البيت تدقيه علشان ترقيه اكتر ويستوى معاكى
2-تتبليه بنفس طريقة الفراخ البانيه وتكمليه بنفس الخطوات بس تسويه على نار هادية شوية علشان اللحوم بتاخد وقت فى التسوية اكتر من الفراخ
السمك الفيليه
الفيليه سواء لحم او سمك او فراخ يعني اللى مخليه من العظم والجلد
1- نغسل السمك كويس بليمون ودقيق وبعدين نعمله التتبيله ثوم متقشر+فلفل اخضر+عود شبت او بقدونس+ملح+كمون+ليمون نفرمهم سوا وننقع فيهم السمك الفيليه
2-نعمله فى بيض وبقسماط بنفس الطريقة اللى فاتت ونحمره فى زيت على نار متوسطة ويتقدم مع ارز وسلطة
لو عاوزة تطلعى الفراخ البانيه والسمك الفيليه زي بتاع كنتاكى
تحطى مع البقسماط كورن فليكس متكسر خشن وكملى بنفس الخطوات عادى