عاوزة ادخل واتعلم وابدا اطبخ اكيد هبدا بالاكل التقليدي هنبدا سوا ان شاء الله نتعلم الاكل التقليدي وازاى نقدم وجبة حلوة وبعدين ندخل بقى فى التجديد ونظام العزومات والحاجات الحلوة دة والحلويات لجد ما نبقى بريمو ان شاء الله
البيكاتا بالشامبنيون
هى اكلة فرنسية والاساس فيها انها بتتعمل بالفراخ بس مشهورة اكتر باللحوم وبتطلع تحفة بجد
اكلة راقية وشيك وبحس انها اكلة رومانسيه كده جوزى بيحبها موت ويارب بتعجب جوزك انتى كمان
1-هنتبل شرايح اللحم الفيليه ببصل وملح وبهارت زي تتبيلة البانيه كده ونسيبها فى التلاجه ليلة كاملة ولو مستعجلة حاولى تسيبيها على اد ما تقدرى تتبل فى التلاجه
2-فى طاسه هتحطى معلقتين سمنة بلدي ومعلقتين زيت وهتحطى اللحمة تتشوح على الجهتين لحد ما لونها يتغير ويبقى دهبي
3-هنشيل اللحمه فى طبق
4- فى نفس الزيت اللى حمرنا فيه اللحمه هنحط بصله متقطعه جوانح والمشروم المتقطع ونقلب كويس لحد ما لونهم يتغير على نار هادية
5-هنضيف الكريمة اللبانى عليهم وبعدين نضيف اللحمه ونسيبهم على نار هادية لحد ما اللحمه تستوى وبعدين نقدمه (او مفيش كريمة لبانى هنضيف معلقتين دقيق ونحمرهم وبعدين نضيف لبن كأننا بنعمل بشاميل وبعدين نضيف اللحمه)
6-هنغرف الرز او المكرونة فى جمب من الطبق وفى جمب الطبق التانى هنحط اللحمة وفوقها الصوص بتاعها وممكن نقدم معاها بطاطس محمرة واى نوع سلطة خضرا
*ممكن نستخدم الفراخ الفيليه بدل اللحمه وهنمشى بنفس الطريقة بالضبط
طريقة المحوجة(منقولة ولسه هنجربها فى مروة)
المقادير:
1 كوب حلبة محوجة ناعمة ( من العطار )
1 كوب زيت ذرة
1 كوب سكر بودرة
3 كوب دقيق
1/4 : 1/2 كوب عسل أسود
بيكنج بودر
ماء دافئ (قد لا تحتاجينه)
الطريقة
1- تخلط المكونات الجافة وتقلب.
2- يضاف الزيت والعسل الأسود للخليط السابق ويعجن جيدا ويمكنك إضافة اقليل من الماء الدافئ إذا وجدتي العجين لا يتجانس.
3- تعجن العجينة حتى تصبح متماسكة غير لينه صلبة نوعا ما.
4- تفرد العجينة في الصينية بسمك 1.5 سم ثم تقطع مستطيلات رفيعة ( أو على حسب رغبتك ).
الطبخ: 1- توضع الصينية في الفرن الساخن على درجة حرارة متوسطة حتى تحمر من الجوانب.
2- أخرجي الصينية وأعيدي تقطيعها بخفة ثم أعيديها للفرن وأشعلى الشواية لتحمر من الوجه ثم أخرجيها واتركيها حتى تبرد تماما.
ملاحظات: عندما تخرجيها من الفرن تكون طرية ولكن بعد أن تبرد تصبح مقرمشة ولذيذة.
هذا البسكويت رائع للأطفال والحوامل والمرضعات لما في الحلبة والعسل الأسود من فوائد رائعة.
التبولة
نوع من السلطات الشامية بس جميلة جدا بصراحه ومغذية اوى كمان
1-هنغسل كوب برغل ناعم وننقعه حوالى ساعتين
1-هنقطع الخضار كله ناعم جدا(بقدونس-نعناع اخضر-خس-طماطم-خيار-بصله او بصل اخضر
2-هنصفى البرغل ونضيف عليه اللمون المعصور بكمية حسب رغبتك
3-هنضيف زيت الزيتون ورشة ملح ورشة قرفة وبعدين نضيف الخضراوات ونقلبها كويس جدا وبعدين تتقدم
البريانى باللحم
1-هنسلق اللحمة عادى (كيلو لحمة )واللى مش عارف طريقتها موجودة فى صفحة 1
2-هنغسل الرز البسمتي (حوالى 3 كوبايات)وننقعه نص ساعه
3-هنقطع بصلتين كبار جوانح ونشوحهم فى معلقة سمن ومعلقة زيت ونضيف عليهم التوم المدقوق(حوالى 12 فص توم ) ونقلب لحد ما التوم يصفر
4-هنضيف قطع اللحمة وبعدين نضيف البهارات (معلقة كبيرة كسبرة-معلقة كبيرة كمون-معلقة كبيرة قرفه-معلقة كبيرة جنزبيل-معلقة كبيرة فلفل اسود-عودين قرنفل-فصين حبهان-شطة حسب الرغبه-معلقتين زبادي كمان حسب الرغبه)
5-هنقلب كويس وبعدين نضيف معلقة صلصة كبيرة وبعدين نضيف الشوربة(اللى يكفى تسوية الرز) ونضبط الملح
6-هنصفى الرز ونضيفه للخليط على نار عالية لحد ما الشوربة تنشف وبعدين نهدى النار عليه لحد ما الرز يستوى
7-هنضيف الزعفران اللى مدوبينه فى شوية ميه ونرشه على البريانى ونغطيه حوالى 10 دقايق وبعدين يتقدم وممكن نذوق وش البريانى ببصل محمر او مكسرات محمصة
على فكرة الخطوة الاخيرة اختياري وانا عمرى ما حطيت زعفران لانه غالى جدا
بريانى الفراخ
نفس بريانى اللحم وهنستبدل اللحم بالفراخ
الاستيك المشوى
1-هنجيب قطعة لحم استيك من الجزار وبعدين نغسلها كويس ونخرمها بالشوكة فى كذا منطقة علشان تشرب التتبيلة كويس
2-هنتبلها بتتبيله المشويات اللى قلنا عليها فى صفحة 25 ونسيبها ليله فى التلاجه
3- هنشويها على الشوايه وكل شوية نشربها من التتبيله علشان ما تنشفش ونقلبها على الجهتين لحد ما تستوى وتتقدم
الحمام المحشى بالفريك
1-هنغسل الفريك كويس وننقعه فى مية حوالى ساعه
2-هنغسل الحمام كويس جدا بالخل والملح وبعدين ننقعه فى ميه ودقيق وملح ولمون
3-هنجهز الحشوة علشان نحشى بيها الحمام:هنقطع بصل ناعم وندعكه كويس بالملح والفلفل الاسود والبهارات وبعدين نضيف الفريك وندعكهم كويس وبعدين نقطع عليه كبد واوانص الحمام
4-هنحط الخليط على النار ومعاه معلقة سمنة بلدى وكوبايه مية ونهدى النار عليه لحد ما يدخل فى السوا
5-هنغسل الحمام وبعدين نحشي قلبه بالخلطة ونحشى الرقبه بس ناخد بالنا يبقى فيه فراغات علشان الحشوة هتزيد والحمام ما ينفجرش وهو بيستوى وبعدين نخيط الحمام علشان الحشوة ما تخرجش بره
6-هنغلى مية على النار مع بصله وفصين حبهان وورقة لورا ونسقط فيها الحمام ونهدى النار عليه لحد ما يبدا يدخل فى السوا وبعدين نضيف الملح (لو حطينا الملح من الاول الحمام هياخد وقت اطول فى السوا) ونسيبه يكمل سوا
7-هنشيل الحمام من الشوربة ونسيبه يهدى شوةية وبعدين نحمره فى معلقتين سمن بلدي ومعلقتين زيت ويتقدم
8-لو عندنا حشوة باقيه هنزودها ميه ونسويها لوحدها ونفرشها فى الطبق ونقدم عليها الحمام
الحمام محشى ارز
نفس الخطوات اللى فاتت بس مش هننقع الرز زي الفريك لالالا هنستخدمه على طول
صينية السمك
ممكن تقطعى فى صينية بصل وطماطم وفلفل ولمون وتحطى السمك زي ما هو عليهم وترشى ملح وفلفل اسود وكمون ورشة زيت وشوية مية وتغطى الصينية وتدخليها الفرن لحد ما السمك يستوى وبعدين تكشفيها لحد ما السمك والخضار يتحمر كويس وتطلعيها مع ارز ابيض بتبقى حلوة اوى
السمك الصيادية
بنفس الطريقة اللى قلتيها وممكن تبدلى الطماطم بصلصلة الطماطم
الجمبرى بالخضار
1-هنغسل الجمبرى زي ماهو تحت الحنفيه من غير ما نقشره ولا نشيل منه اى حاجة
2-هنحطه فى حلة ونقطع عليه بصله وفلفلة وشوية توم وشبت او كسبرة او بقدونس ونعصر عليه شوية لمون ونحط قشر الليمون كمان معاه وجزرة مبشورة
3-هنحط ملح وكمون ورشة خل وشطة حسب ما تحبي
4- هنحطه على النار شوية لحد ما يبدا يغلى ونهدى النار عليه لحد ما يبدا لونه يتغير يبقى كده بدا يدخل فى السوا هنسيبه على النار شوية لحد ما يستوى وبعدين يتقدم
ممكن تقدميه مع ارز ابيض او ممكن يتقدم كمقبلات بيبقى حلو اوى
تنظيف الجمبرى
سهل جداااااااااااا
1-هتمسكى الراس كويس وتمسكى جسم الجمبرى وتشدي الراس هتلاقيها تتخلع معاكى
2-هتمسكى رجلين الجمبرى وتخلعيها هتتخلع مع القشرة اللى عليه بس ما تخلعيش الديل
3-لو الجمبرى حجمه كبير هتلاقى خط اسود فى ظهر الجمبرى وده اسمه كيس الرمل (بيبقى خيط كده ) هتفتحى ظهر الجمبرى بسكينة وتشيلي الخط ده وترميه
4-هتغسلي الجمبرى تحت الميه عادى وكده الجمبرى نظيف وجاهز للطبخ
الجمبرى البانيه
1-بعد ما غسلنا الجمبرى وطبعا مخلعناش الديل ما ننساش(الديل بيديله شكل حلو اوى)هنتبله بملح ولمون وكمون وممكن معلقه زبادى ومعلقة خل ولو تحبى كمان رشة كركم وفص توم
2-هنسيبه فى التتبيله حوالى ساعه
3-هنغطي الجمبرى بالبيض المضروب فى رشة ملح وكمون وبعدين فى البقسماط وبعدين نحطه فى التلاجه حوالى نص ساعه علشان القشرة تمسك فيه
4-هنحمره فى زيت سخن على نار متوسطة وبعدين يتقدم مع ارز بنى او يتعمل ساندوتشات
هنقدم معاه سلطة زبادي بتبقى هايله معاه
سلطة الزبادى
علبه زبادي+معلقتين مايونبز+فص توم مفروم ناعم جدا+رشة ملح خفيف ونقلبهم كويس ونقدمهم
الارز البنى