الممبار
مشكلة الممبار الاولى والاساسية هى التنظييييييييييييييف
فيه ناس بتشتريه متنظف جاهز بس برضه لازم تعيدي عليه تنظيف فى البيت
وفيه طريقة سهله للتنظيف
1- اقلبي الممبار وانقعيه فى خل (لان الخل بيخلى الدهون اللى على الممبار تتكتل على بعضها وتتنظف بسرعه) وسيبيه ييجي 10 دقايق
2-اكحتى الممبار بالسكينة علشان تتخلصى من الدهون دي
3-اغسلي الممبار كويس اوى تحت الحنفية وبعدين اغسليه بملح وليمون ودقيق
4-ننقعه فى ملح وخل وبقدونس مفروم وليمون علشان ريحته تبقى حلوة
5-هنقطع الممبار حتت كده على اد ما هتتحشى بالطول اللى تحبيه
كده الممبار جاهز للحشو والطبيخ
طريقة طبخ الممبار
1-نحشى الممبار بنفس خلطة المحشى بس ناخد بالنا يكون فيه فراغات كتير ما نملاهوش رز كله لان الرز هيزيد جدا ومش عاوزين الممبار ينفجر
2-فى حله على النار نحط ميه مع ملح وفلفل اسود وحبهان لحد ما تغلى
3-نهدى النار وبالراحه اوى نسقط فيها الممبار واحده واحده وهنلاقى اطراف الممبار اتقفلت اول ما اتعرضت للمية السخنه
4-نسيبه يستوى كويس على نار هاديه ومش هياخد وقت طويل ونخلى بالنا منه كل شوية علشان ما ينفجرش مننا لو فضل كتير على النار*
5-نشيل الممبار فى مصفاه وبعدين نحمره فى معلقيتن سمنة بلدى ومعلقتين زيت ويتقدم ومعاه الشوربة بتاعته وممكن نعمل جمبة فتة
ملحوظة
من باب توفير الوقت والمجهود ممكن تحشى الممبار وتسويه وتعينيه فى اكياس فى الفريزر وتطلعيه يادوب على التحمير (ناس كتير بتعملها بس انا مجربتهاش لانى مش بجيبه كتير)
الفتة بالخل والتوم
1-نطبخ ارز ابيض عادى زي ما قلناه فى الاول
2-نحمص تحت الشوايه عيش ونقطعه قطع متوسطة
3-نحمر توم كتير وبعدين نضيف عليه خل وشوربة ونسيبه يغلي لثوانى
4-فى طبق التقديم نحط طبقة ارز وطبقة عيش وبعدين شوية دقة وشوية شوربة ونقدم باقى الدقه فى صحت جمب الفتة
ودى الفتة اللى بتاع العيد برضه اللى بتتعمل مع اللحوم ولحمة الراس والكوارع
اداره الامنتدى
موضوع: طريقه عمل الممبار والفته 
الأحد 26 يوليو 2009, 4:57 pm
الموقع
